Чилитэй тос

Заримдаа чилитэй хоол хиймээр санагдаад авчихаар идэж барахгүй үлдчихээд байдаг даа? Тэгвэл чилитэй тос хийгээд тавьчихвал хэзээ ч хоолны амтлагч болгоод хэрэглэх боломжтой. Ялангуяа пиццан дээр дусааж идвэл бүр ч янзтай.

Орц:

• Чили 
• Наранцэцэгийн тос (оливын тос хэтэрхий хурц амттай болж магадгүй)

Чилитэй тосоо хийж хадгалах шилээ эхлээд духовканд хийж ариутгана. Тосоо хайруулын тавганд хийгээд дунд зэргийн гал дээр халаана. Тосоо халангуут чилигээ таллаж хэрчиж байгаад хийнэ. 2 орчим минут тосондоо чилигээ байлгаад галаа унтраана. Гал хэт халуун байвал чилигээ түлэх аюултай. Тосоо халуун дээр нь ариутгасан шилэн дотроо хийгээд хөргөснийхөө дараа таглаад хадгална. Тосны өнгө яваандаа улаан болно. Тэгвэл амт улам хүчтэй болсон байна гэсэн үг. Амжилт хүсье. Хэрэгтэй зөвлөгөө байсан байх гэж найдаж байна. 

*Чилигээ жижиглэж хэрчих тусам амт нь хүчтэй болохыг анхаараарай.

Англи хэлний үгийн санд:

1. Чили- chilli
2. Наранцэцгийн тос- sunflower oil
3. Оливын тос- olive oil

Франц шарсан талх

Өнөө өглөө цаг амжихгүй болохоор нь Франц шарсан талх хийлээ. Хийхэд амархан энэ талхыг чихэрлэг эсвэл давстай хийж болно. Хэрвээ давстай хийсэн бол кетчуптай хольж идвэл зүгээр санагддаг. Харин чихэрлэг хийвэл варень, шоколадны соус, агч модны сироп, молокотой хольж идвэл янзтай.

Орц:

• Өндөг 2ш
• Талх 4 зүсэм
• Давс чимх
• Элсэн чихэр 1 хоолны халбага
• Сүү 1 хоолны халбага
• Тос 1 цайны халбага

Өндөгнүүдээ аяганд хагалж хийгээд сүү, элсэн чихэр, давсаа хийж сайтар хутгана. Тосоо хайруулын тавгандаа хийж халаагаад, талхаа өндгөндөө дүрээд шарна. Тал бүрийг нь 2 минут орчим шарна. 

Англи хэлний үгийн сан:

1. Агч модны сироп- maple syrup
2. Шоколадны соус-chocolate sauce
3. Молоко- condensed milk
4. Варень- jam
5. Франц шарсан талх- French toast

Бууцай, бейконтой фриттата

Энэ долоо хоногт өглөө болгон өөр өөр хоол хийж идэхээр шийдээд хуваарь гаргачихлаа. Даваа- омлет, Мягмар- Фриттата, Лхагва- Гриллдсэн бяслагтай талх, Пүрэв- Хулууны шөл, бяслагтай талх, Баасан- Махтай бин. Өнөөдөр Мягмар гарагийн өглөө болохоор бейкон, бууцайтай фриттата хийж идлээ.

                                                Орц:

• Бейкон 50г                                                                
• Өндөг 4ш
• Бууцай 100г
• Давс, перец
• Тос 1 хоолны халбага
• Сармис 1 хумс
• Төмс 2ш

                                      

Шарах зуухаа 200 хэм дээр тавьж халаана. Сармисаа нухаад жижиглэж, бууцайгаа 4 см урттай хэрчинэ. Бейконыг жижиг дөрвөлжин хэрчинэ. Төмсөө нимгэн бөөрөнхий хэрчээд 5 минут буцалгана. Аяганд өндөгнүүдээ хагалж хийгээд дээр нь бейкон, бууцай,  сармисаа хийж давс, перецээр амтлаад хутгана. Тортны хэвээ тослоод, чанасан төмснүүдээ ёроолыг нь бүрхтэл өрөөд давсална. Дээр нь өндөгнийхөө зуурмагийг асгаад зуухандаа хийж 8 минут болгоно. Бас листэн дээрээ талхнууд тавиад шарвал бүр ч янзтай. Бэлэн болсон фриттатагаа дөрөв хуваагаад 2, 2-оор нь таваглана.

Англи хэлний үгийн санд:

1. Бууцай- spinach
2. Тортны хэв- cake tin
3. Фриттата-frittata
4. Жижиг дөрвөлжин хэрчих- to dice

Хятад өглөөний цай

Хятадууд иймэрхүү өглөөний хоол идэх дуртай байдаг. Оюутан байхдаа хааяа нэг авч иддэг байсан юм. Харахад эвгүй мэт боловч амт нь гоё. Өглөөний хоол өдөр бүр өөр өөр байдаг бол гоё сонирхолтой, сэрээд гоё хоол иднэ гэж бодохоор урамтай ч сэрэх байх.

Орц:

• Өндөг 4ш
• Хар цуу 4 хоолны халбага
• Далиу 2 дэлбээ
• Башир цэцэг 2 ш
• Цай (ууттай цай бол 1ш, уутгүй бол 1 хоолны халбага)
• Давс 1 цайны халбага
• 1 аяга ус
• Элсэн чихэр 1 цайны халбага
• Хар перец бөөрөнхий 2ш
• Урт будаа 1 аяга
•  3 аяга ус

 Өндгөө 3-5 минут цэвэр усанд чанаад хүйтэн усанд сойно. Энэ хооронд хар цуу, 1 аяга ус, бүх амтлагчнуудаа цайны хамт хийгээд хутгана. Өндгөө хөрөнгүүт хатуу гадарга дээр алгаараа өнхрүүлж хальсыг нь бяцална. Ингэхдээ болгоомжтой байхгүй бол нэг өндгөө дундуур нь хуваачихсан. Хальсыг нь няцлах болохоос хуулахгүйг анхаараарай. Бяцалсан хальстай өндөгнүүдээ нөгөө соусандаа хийгээд зөөлөн гал дээр 30 минут чанана.
Будаагаа угаагаад, буцалсан 3 аяга усанд хийгээд агшаагчныхаа зутан хийдэг сонголт нь дээр тавина. Бараг цаг гаруй буцална гэсэн үг. Энэ хоолыг ер нь өмнөх орой нь бэлдээд тавьсан нь дээр юм билээ. Өглөө амжихгүй байх магадлал өндөр.

Будааныхаа зутан дээр шарсан мах, сонгино, давсалсан далай байцаа тавьж идэж болно. Өнөө өглөөний хувьд амжаагүй учраас тэгж чадсангүй. Өдрийг сайхан өнгөрүүлээрэй.

Англи хэлний үгийн санд:

1. Далиу- star anise
2. Башир цэцэг- clove
3. Ууттай цай-tea bag
4. Урт будаа- long grain rice

Жап Чае буюу пүнтүүзтэй хуурга

Солонгосд нэлээн түгээмэл байдаг хоолнуудын нэг Жап Чае. Хүүхэд байхдаа ханиад хүрээд,  аавыгаа пүнтүүзтэй хуурга хийгээд өгөөч гэж гуйж байлаа. Тэгээд аав маань гараа гаргаж пүнтүүзтэй хуурга хийж өгсөн чинь ухаангүй их идсэн. Даанч бие муу байсан болохоор удахгүй бөөлжөөд гаргачихсан. Одоо бодоход аав маань гомдсон байх даа. Гараа гаргаж хийсэн хоолыг нь гаргачихаар... Гэхдээ пүнтүүзтэй хуурган дуртай хэвээрээ байгаа:)

4 хүний порц
Орц:

• Пүнтүүз тал уут
• Мах 200г
• Улаан перец 1ш
• Далайн байцаа 50г
• Лууван 1ш
• Сонгино 1ш
• Сармис 3 хумс
• Тос
• Гүнжидийн тос
• Давс, элсэн чихэр, хар перец
• Хар цуу

 Буцалсан халуун усанд пүнтүүзээ хийгээд таглана. Махаа нарийхан хэрчинэ. Аяганд 2 хоолны халбага хар цуу, 1 цайны халбага гүнжидийн тос, 1 цайны халбага элсэн чихэр, 1 хумс нухсан сармис хийгээд сайн холино. Энэ соусандаа махаа хийгээд сайтар хутгаад орхино. Хайруулын тавганд бага зэргийн тос хийгээд тал сар хэлбэрээр хэрчсэн сонгино, нухсан 2 сармисаа хийж 2 минут орчим хуурна. Дараа нь нарийхан урт урт хэрчсэн лууван, улаан перецээ хийж 5 минут орчим хуурна. Далайн байцаагаа жижигхэн хувааж байгаад халуун усанд хийж дэвтээнэ. Далайн байцаагаа сойгоод, соустай махтайгаа хамт хийгээд давс перецээр амталж, 5 минут орчим хуурна.

Пүнтүүзээ сойгоод, 2 хоолны халбага цуу, 1 цайны халбага элсэн чихэр, 1 цайны халбага гүнжидийн тосоор хийсэн соус дээр нь хийж сайн хутгана.

Мах, ногоо нь болсон үед пүнтүүзээ дээр нь хийж хутгаад Жап Чае бэлэн боллоо. Кимчи эсвэл дарсан өргөс хэмхтэй идвэл янзын гоё амттай.


Англи хэлний үгийн санд:

1. Пүнтүүз- glass noodles
2. Дарсан өргөст хэмх- gherkins эсвэл pickled cucumber
3. Гүнжидийн тос- sesame oil
4. Хар цуу- soy sauce
5. Соус- marinade

Зууханд шарсан өндөг

 Өглөөний цайгаа янз бүрээр хийж идэх хүсэлдээ автаад зууханд шарсан өндөг хийж үзлээ. Гоё л болдог юм байна. Дээр нь бейкон жижигхэн хэрчээд эсвэл улаан лоолинд болгосон шош хийвэл улам гоё болох юм шиг санагдлаа. Өглөө эрт сэрсэн, тухтайхан цайгаа уумаар үедээ хийхгүй бол цаг их орж магадгүй.
2 хүний порц

Орц:

• 4 өндөг (өрөөний температурт)
• Крем (whipping cream) эсвэл цөцгий байсан ч болно
• Давс, перец
• Хатаасан ганга өвс
• Масло
• Сармис 1 хумс
• Багахан пармежан бяслаг
• Талх 4 зүсэм

 Зуухаа 180 хэм дээр тохируулна. Эхлээд аягануудынхаа ёроолыг маслоор тосолно. 1 аяганд 2 өндөг шарыг нь хагалахгүйгээр хийгээд дээр нь крем, амтлагчууд, пармежан бяслагаа үрж хийнэ. 1 хумс сармисаа арилгаад уртааш нь 2 хуваана. Талхнуудаа хоёр талаас нь сармис, маслоор үрнэ. Зуухаа халангуут зурган дээрх байдлаар хийнэ. 7 минут шарсны дараа зуухаа унтрааж, 3 минут байлгана. Зуухнаас гаргаад шууд талхаа дүрж идэх боломжтой. Салахын аргагүй үнэхээр гоё амттай шүү. Цагаа сайн барих нь чухал, тэгэхгүй бол шар нь хэт болчихвол энэ хоол утгаа алдана.

Англи хэлний үгийн санд:

1. Зууханд шарах- to bake
2. Крем- cream
3. Улаан лоолинд болгосон шош- beans in tomato sauce
4. Цөцгий- sour cream

Карбонара

Ойрдоо хурим гээд блогоо бичих зав гарсангүй. Завгүй эсвэл ядарсан үедээ хүн болгон л хурдан, амархан хоол хийхийг хүсдэг дээ. Тэгээд өчигдөр орой карбонара хийлээ. Материал нь бэлэн байвал энэ шиг амархан бас амттай хоол байхгүй. За ингээд Италийн алдарт карбонара паста яаж хийх талаар сурцгаая.

Орц:

• Спагетти (тал уут)
• Бейкон буюу гахайн утсан мах (1/4 уут)
• Сармис 1 хумс
• Хар перец 1/2 цайны халбага
• Оливын тос
• Кремэн бяслаг (2 хоолны халбага)
• Пармежан бяслаг
• Сүү (2 хоолны халбага)
• Өндөг 1ш
• Ногоон вандуй  (1/4 лааз)
• Давс 1 цайны халбага

Гоймонгоо буцалж байгаа давстай халуун усанд хийгээд 10 орчим  минут чанана. Энэ хооронд бейконоо 1см өргөнтэй, сармисаа нухаж жижиглэн хэрчинэ. Лаазтай вандуйгаа шүүгээд усаар зайлна. Вандуй заавал хийх албагүй, гэхдээ бейкон, пармежан бяслаг нь давслаг байдаг болохоор чихэрлэг амт оруулах гэж ногоон вандуй хийсэн. 1 хоолны халбага орчим оливын тосоо хайруулын тавгандаа хийж халаагаад, сармисаа хийж хуурна. 30 секунд хуурсны дараа бейконоо хийж хуурна. Бейкон нь улаан шаргал болтол 2 минут орчим хуураад перецээр амталж, ногоон вандуйгаа нэмээд галаа багасгана. Кремэн бяслаг, сүүгээ хийж хутгана. Дараа нь гал нэлээн бага болсон хойно өндгөө хагалж хийгээд сайтар хутгана. Хэт халуун гал дээр өндгөө хийвэл шарсан өндөг болчихдог учраас галаа бууруулах ёстойг мартаж болохгүй шүү. Одоо үрсэн пармежан бяслагаа нэмж хутгана.
Эцэст нь болсон гоймонгоо шүүж, хийгээд сайн холиод таваглана. Карбонараг цагаан винотой идэхэд үнэхээр гоё байдаг. Нөхөр эсвэл найз залуугаа гоё бас амархан хоолоор дайлъя гэвэл карбонара хийж өгөөрэй. 20 минутанд л бүх зүйл бэлэн болдог;)   

Англи хэлний мэдлэгт:

1. Bacon- бейкон буюу утсан гахайн мах
2. Cream cheese- кремэн бяслаг  оросоор сливочный сыр
3. Parmesan- Пармежан бяслаг
4. Grean pea- Ногоон вандуй
5. Pasta- Гоймон, паста

Туулайн дүрстэй жижиг кекс

Хайртынхаа төрсөн өдрөөр гэртээ байж чадахгүй болохоор түрүүлээд сюрприз барья гээд хийсэн жижиг кекснүүд. Хийхэд маш энгийн, гэхдээ жаахан уран сэтгэмж бас хөдөлмөр шаардана. Эхлээд туулайн хэлбэртэй хийхийн тулд туулайн чихний хэлбэрийг нетээс татаж аваад хэвлэнэ. Дараа нь хайчилж байгаад ард нь шүдний чигчлүүр дундуур нь хуваагаад скочоор нааж бэлдэнэ.

Орц:

• 2 ш өндөг (өрөөний хэмд байсан)
• 100г масло (өрөөний хэмд байсан)
• 1 аяга элсэн чихэр
• 1 аяга шигшсэн гурил
• 1 цайны халбага ванилин
• 2 хоолны халбага сүү
• Тал аяга үзэм
• Тал аяга бүйлс 

 Крем: Бэлэн крем аваад хэт нялуун болохоор нь цөцгийтэй хольсон.

Чимэглэл:

• 5 ш үзэм (нүд хийхэд ашигласан)
• Бөөрөлзгөнийн компот (хамар хийсэн)
• Хэвлэсэн цаасан туулайн чих

Зуухаа 180 хэм дээр халаана. Маслоо элсэн чихэртэйгээ хамт миксерт хийж холино. Дараа нь өндгөө нэг нэгээр нь хийж дахин миксердэнэ. Ванилинаа нэмнэ. Гурилаа бага багаар шигшиж хийнэ. Сүүлд нь хоёр халбага сүүгээ хийгээд үзэм, бүйлсээ хийж сайтар хутгана. Элсэн чихэр нь нарийн ширхэгтэй байх ёстойг анхаараарай. Жижиг кексний хэвэндээ бэлэн цаасан хэвнүүд хийгээд 3/4 хүртэл нь зуурмагаа хийнэ. Нийт 10 ширхэг жижиг кекс гарсан. Халсан зуухандаа хийгээд гадна тал нь шаргал болтол 25-30 минут шарна. Болсон эсэхийг нь шалгая гэвэл шүдний чигчлүүрээр хатгаад гурил наалдахгүй цэвэрхэн гарч ирвэл болсон байна гэсэн үг. 

Кекснүүдээ гаргаад 5 минут хэвтэй нь  байлгаад хэвнээс нь гаргаж бүрэн хөргөнө. Хөрсөн кекснүүдээ зурган дээрх шиг чимэхэд туулайнууд бэлэн болно доо. Миний төсөөлснөөс царай муутай болчихсон. Гэхдээ сэтгэлээ гаргаж хийсэн болохоор хайртад маань таалагдсан байх гэж найдаж байна:) Хийгээд байвал сайжрах байх. Анх удаа хийсэн болохоор туршлага дутлаа хэхэ. Ийм кекснүүд идэхэд цэвэрхэн бас хүссэнээрээ чимэглэх боломжтой байдаг учраас сүүлийн үед хүмүүс их хийдэг болсон гэсэн. За тэгээд хайртаа хүмүүстээ хөөрхөн сюрприз барья гэвэл яагаад туршаад үзэж болохгүй гэж?

Англи хэлний мэдлэгт тань:

1. Жижиг кекс- cupcake
2. Цөцгий- sour cream
3. Кексний хэв- cupcake tin
4. Туулайн чих- bunny ears
5. Шүдний чигчлүүр- toothpick

Шарсан хонины гуя

Taste of UB арга хэмжээнд очиж үзсэн чинь хонины махыг ингэж шарж идмээр санагдаад хийлээ. Бямба гаригийн орой нь махаа хөлдөөгчнөөс нь гаргаад, хөргөгчиндөө хийж гэсгээж хонуулна. Маргааш өглөө нь амталж байгаа шарахад янзын боллоо. Нийт 2 цаг 30 минут шарах шаардлагатай. Удаан шарах тусам мах нь зөөлөн болно. Махаа сайн гэсгээсэн байх тусмаа хурдан бөгөөд жигд болно.


Орц:

• Хонины гуя
• Давс, перец
• Стейкны амтлагч 4 хоолны халбага
• Ганга өвч
• Сонгино том 1ш (тал саран хэлбэртэй хэрчсэн)
• Сармис 3 хумс
• Төмс 4ш (том дөрвөлжин хэрчсэн)
• Лууван 2ш (бүдүүн хэрчсэн) 
• Жижиг улаан лооль 6ш
• Оливын тос

Улаан лоолиос бусад бүх ногоонуудаа амтлагч, давс перецтэй, оливын тостойгоо холино. Миний хувьд нэг удаагийн бээлий өмсөж байгаад хольчихвол гар заваарахгүй амар байдаг юм. Махаа мөн л адил гадна талыг нь амтлагч, давс, перец, оливын тосоо сайтар түрхэж тараана. Зуухаа 150 хэм дээр тавиад, халангуут нь мах, ногоогоо хийгээд 2 цаг шарна. Хэт халуун дээр шарвал доторх нь шүүрхий, гаднах нь түлэнхий борц шиг болчихно. Сүүлийн 30 минутанд улаан лоольнуудаа хийж хутгаад шарна. Таваглахдаа шинэ ногооны салат эсвэл будаатай хийвэл бүр ч гоё. За тэгээд Ням гаригт гэр бүлээрээ шарсан махаа идэх шиг сайхан мэдрэмж ховор байдаг даа. Амжилт хүсье:)

Англи хэлний үгийн санд:

1. Ганга- Thyme
2. Стейкний амтлагч-Steak Seasoning
3. Том дөрвөлжин хэрчсэн- Cut into big chunks
4. Шарсан хонины мах- Roast lamb (хурганы мах)
5. Гэр бүл- Family
6. Хөргөгч- Fridge
7. Хөлдөөгч- Freezer

Тахианы махан котлеттэй өглөөний хоол

Анх удаагаа тахианы махаар котлет хийж үзлээ. Дажгүй болдог юм байна. Хамгийн гол нь жаахан аргуун болчихсон. Шүүслэг болгох ямар арга байдгийг нь судалж байгаад дараагийн удаа хийж үзнээ.

Орц:

• Тахиа 200г 
  
• Сонгино 1ш
• Сармис 2 хумс
• Яншуй 1 атга
• Үсүү 1 атга
• Төмс 1ш
• Давс, перец
• Өндөг
• Салатны байцаа
• Бяслаг
• Песто
• Талх 1 зүсэм

Сонгино, сармис, төмсөө эхлээд миксер дотроо хийгээд машиндана. Сайн машиндаж жижиглэсний дараа тахианыхаа мах, яншуй, амтлагчнуудаа хийж машиндана. Бэлэн болсон махаа хэсэг хэсгээр нь авч котлетоо бага зэргийн тостой хайруулын тавганд дунд зэргийн гал дээр битүү шарна. Тахианы махыг хэзээ ч шүүрхий идэж болохгүй учраас 20 минут шарлаа. Нэг талаар нь 10 минут шарна. Эсвэл над шиг өглөөний хоол бэлдэж байгаа бол түүхий котлетуудаа уутанд хийгээд хөлдөөчих. Маргааш өглөө нь шарах шүүгээнд сайн гэсгээж байгаад шарна. 

Таваглахдаа талхан дээрээ песто түрхээд, дээр нь салатны байцаа, нарийн зүссэн бяслаг (чеддар, мозарелла аль нь ч байж болно), тахианы котлет, нүдэлж шарсан өндгөө тавина. Сэрээ, хутгаа аваад ммммм..

Англи хэлний үгийн санд:

1. Тахианы котлет- chicken pattie
2. Песто- pesto (базилик, самар, сармис, оливын тостой хольсон амтлагч)
3. Яншуй- Parsley
4. Үсүү- Coriander
5. Чеддар бяслаг- Cheddar cheese
6. Мозарелла бяслаг- Mozzarella cheese

Кимчитэй шөл

Хайртынхаа захиалгаар хийсэн кимчитэй шөл. Эрүүл гэсэн болгоныг шингээсэн Солонгосын алдартай хоолыг жаахан Монголчлоод хийчихлээ.

Орц:

• Кимчи 1 уут
• Үхрийн мах 200г
• Төмс  1 ш
• Лууван 1ш 
• Далайн байцаа 2 хоолны халбага
• Дүфү
• Байцаа 1/4 
• Сонгино 1 ш (жижиг хэрчсэн)
• Сармис 2 хумс
• Цагаан гаа 1 хэрчим
• Шар буурцагны нухаш (2 цайны халбага)
• Давс, перец
• Жижиг ширхэгтэй цагаан будаа

Будаагаа агшаана. Махаа сайн гэсгээж байгаад нарийхан зорж, ногоонуудаа дөрвөлжин хэрчинэ. Тогоондоо 3 том аяга хүйтэн ус хийгээд дээр нь хэрчиж бэлдсэн ногоонууд, мах, давс, перец, шар буурцагны нухаш зэргийн амтлагчнуудаа хийнэ. Зөөлөн гал дээр буцалгана. 30 минут орчмын дараа амсаж үзээд шаардлагатай бол давс нэмнэ. Шөл, будаагаа тусад нь аягалаад идэхэд бэлэн болно доо. Амралтын өдрүүдээ сайхан өнгөрүүлээрэй.

Англи үгийн санд:

1. Байцаа- cabbage
2. Шар буурцагны нухаш- soybean paste
3. Жижиг ширхэгтэй цагаан будаа- short grain white rice
4. Дүфү- tofu
5. Цагаан гаа- ginger
6. Бага гал дээр хийх-  to cook on low heat
7. Кимчитэй шөл- kimchi soup

Англи өглөөний хоол

Ойрдоо ямар аймшигтай завгүй байна аа? Блогоо бичих зав гарахгүй юм. Миний амьдарл ч амралтын, ажлын өдөр ялгаагүй компьтерийн ард өнгөрдөг болж дээ хэхэ. Өглөөний цайгаа л алгасахгүй идэж байна. Энэ удаа Англи өглөөний цай бэлдлээ. Гэхдээ мэдээж өөрийн болгож, эрүүл маягаар хийсэн.

Орц:

• Хиам 1 бүдүүн зүсэм
• Өндөг 1ш
• Талх 2 зүсэм
• Улаан лоолийн соустай буурцаг

Хайруулын тавгандаа бага зэрэг тос хийгээд өндөг, хиамаа хийж шарна. Өндгөө нүдэлж шарах арга маань хайруулын тавгаа сайн халааж байгаад өндгөө хийнгүүтээ таглаад галаа унтраана. Таглахгүй болохоор өндөг дороосоо түлэгдээд дээгүүрээ түүхий болоод байдаг юм. Өндөг, хиамаа шарагдаж байх хооронд лаазтай улаан лоолийн соустай буурцгаа задлаад, тавганд хийж шарах шүүгээнд халаана. Халаахдаа таглахгүй бол буудаад шарах шүүгээг чинь улаан эрээн болгоно шүү. За тэгээд талхаа шарагчинд шараад, бүгдийг нь ингэж таваглаад Англи өглөөний хоол бэлэн боллоо. 

Англи үгийн санд:

1. Бүдүүн зүсэм хиам- big slice of sausage
2. Улаан лоолийн соустай буурцаг- beans with tomato sauce
3. Шарсан талx- toast
4. Талх шарагч- toaster
5. Таглах- to cover with lid
6. Англи өглөөний хоол- English breakfast (уламжлалт Англи өглөөний хоол шарсан төмс, шарсан улаан лоольтой байдаг. Өглөө эрт хэт олон шарсан юм идвэл муу байх гэж бодоод өөрийнхөөрөө хийлээ.)

Шоколадтай торт- Brownie

 Жаахан онцгүй зураг оруулчихлаа. Гэхдээ амт бол гоё болдог юм байна. Хэт хөөгөөд ирсэн чинь дээд талаараа хагарчихаар нь бүгдийг нь нэгмөсөн хагалаад дээр нь сахарны пудр цацсан. Ийм төрлийн шоколадтай торт угаасаа хөөлт багатай, доторх нь зөөлөн шоколад ихтэй нягт байдгаараа онцлог.

Орц:

• Хар шоколад (Alpen Gold 90г) 2ш
• Масло 100г
• Гурил 2/3 стакан
• Элчсэн чихэр 1 стакан (нарийн ширхэгтэй байвал сайн)
• Жигнэсэн боов хийх нунтаг (орчуулсан чинь ингэж гарч байна) 1 цайны халбага
• Өндөг 3ш

 Зуухаа 180С хэм дээр тавьж халаана. Энэ хооронд өндгөндөө элсэн чихрээ хийгээд ширхэг нь мэдэгдэхгүй болтол нь хутгана. Шоколадаа хагалаад маслотайгаа хамт шарах шүүгээнд хийж 1 минут халаагаад сайн хутгана. Гурилаа, хөөлгөгч нунтагтайгаа холиод шигшинэ. Өндөгний зуурмаган дотроо хольсон масло, шоколадаа аажмаар хийж хутгана. Дараа нь дээрээс нь шигшсэн гурилаа бага багаар хийж зуурмагаа бэлдэнэ. Тортныхоо хэвний ёроолд нь зориулалтын цаас дэвсэж хэлбэрээр нь хайчлээд хажуу талыг нь маслоор тосолно. Эцэст нь зуурмагаа хэвэндээ хийгээд зуухандаа хийж 30 минут болгоно. 30 минутаас хэтрүүлж болохгүй, тэгвэл хатсан торт иднэ гэж мэдээрэй хэхэхэ.

Англи хэлний үгийн санд:

1. Хар шоколад- dark chocolate
2. Жигнэсэн боов хөөлгөгч- baking powder
3. Хөөх-to rise
4. Хайлуулах- to melt
5. Энэ шоколадтай тортны нэр- Brownie

Бананатай шейк

Бананатай шейкний амтанд ороод удаж байна. Заавал гаднаас авч ууж байхаар хааяа гэртээ хийгээд уувал зүгээр байх гэж бодоод хийлээ. Гадуур ихэнхдээ чихэрлэг амттай болгох гээд сироп хийдэг гэсэн. Гэхдээ энэ шейкинд сүү, банана байхад л хангалттай.

Орц:

Сүү (1 аяга)

Банана 1ш

Ер нь банана аваад заримыг нь жимс чигээр нь идэхээр хадгалаад, заримынх нь хальсыг нь арилгаад хэрчээд уутанд хийгээд хөлдөөчихвөл зүгээр юм билээ.  Хөлдөөсөн бананаа сүүтэйгээ блендэрдээд бананатай шейк бэлэн! Сүү уухаар над шиг дотор нь пэлбэгнээд байдаг хүн бол тал аяга сүүн дээр тал аяга цэвэр ус шейкиндээ хийж болно.

Бас хааяа зайрмаг идмээр санагдсан үедээ хөлдүү бананаа блендердээд идвэл яг л зайрмаг гэсэн үг. Таргална гэж санаа зоволтгүй, дээрээс нь амттан идэх хүслээ дарчихна;)

Англи хэлний үгийн санд:

• Сүү- milk
• Блендер- blender
• Шейк- shake
• Хөлдөөсөн банана- frozen banana
• Зайрмаг- ice cream
• Амттан-sweets

Кимчитэй будаа

Заримдаа махан хоол идмээргүй санагдсан үедээ хийж иддэг хоолнуудын маань нэг. Солонгосчууд кимчиг өдөр болгон идэхийг бодоход хүний биед лав муу биш байх. За ингээд кимчитэй будаатай хуургаа хийж сурцгаая.

Орц:

• Кимчи (1 уут)
• Будаа (2 аяга)
• Гүнжидийн тос (1.5 хоолны халбага)
• Өндөг 1ш
• Давс, перец (чимх)
• Оливын тос (1 цайны халбага)

Уг нь агшаагаад хөргөсөн будаагаар хийвэл бүр сайн гэсэн. Энэ удаа хоолноос үлдсэн будаагаар биш дөнгөж агшаагаад ил гаргаад хөргөсөн будаагаар хийлээ. 

Оливын тосоо хайруулын тавганд хийгээд халаана. Тос халангуут кимчигээ хийгээд хуурна. Дээр нь давс, перец, гүнжидийн тосоо хийж амтална. Гүнжидийн тосоо ихдүүлвэл муухай амттай болдог учраас анхаараарай. Ерөнхийдөө кимчи бүгдээрээ халаад ирэнгүүт хөрсөн будаагаа хийгээд хуурна. Кимчигээ будаатайгаа сайн хольж хуураад таваглана. Хамгийн сүүлд нь дээр нь дутуу шарсан өндөг тавиад идэхэд янзын гоё.

Гүнжидийн тос- sesame oil
Агшаасан будаа- steamed rice
Хуурах- to fry
Чимх-pinch

Тарагтай овьёос

Овьёосыг сүүнд буцалгаж идснээс хамаагүй амттай бас хурдан арга олсон шүү. Хамгийн гол нь турах гэж байгаа хүмүүст маш сайн гэсэн. Хайрцагтай сириалнууд ихэнх нь шарсан бас сахар, давс нэмсэн байдаг учраас эрүүл өглөөний хоол гэхэд хэцүү.

Овьёос нь тослог, калори багатай мөн ширхлэг ихтэй. Цусан дахь сахрыг бууруулж, диабитын эрсдлийг бууруулдаг. Бас зүрх, хорт хавдрын эсрэг сайн бөгөөд дархлаа сайжруулдаг олон давуу талуудтай юм байна. Өглөө болгон идэхэд гэмгүй юм шиг байгаа биз? хэхэ

Орц:

• Овьёос
• Тараг (чихэргүйг хийсэн)
• Элсэн чихэрний оронд зөгийн бал

Аяганд овьёсоо хийгээд дээр нь тараг, зөгийн балаа хийгээд сайн хутгаж байгаад иднэ. Зарим хүмүүс урд орой нь ингэж бэлдчихээд унтвал өглөө овьёос нь зөөлрөөд гоё гэдэг юм билээ. Гэхдээ миний хувьд зажилууртай байсан нь дээр юм шиг санагддаг.

Энэ өглөөний цайг өөр янз бүрээр идэж болно. Жишээ нь нэрсний варьентэй, гадил, тоор, гүзээлзгэнэ, чавга гэх мэт төрөл бүрийн жимстэй гээд дуртай зүйлээ хийж идэх боломжтой.

Англи хэлний үгийн баялагт:

1. сириал- cereal
2. овьёос- oats
3. чихэргүй тараг- plain yoghurt
4. зөгийн бал- honey

Тунатай салад

Хамгийн амархан саладнуудын нэг. Эрүүл бүхнийг нийлүүлсэн салад гэхэд болно.
Орц:

• Туна (тал лааз)
• Майонез
• Нимбэгний шүүс
• Өндөг 2 ш (7 минут чанасан)
• Өргөст хэмх
• Улаан лооль (дөрвөлжин хэрчсэн)
• Редиск (нимгэн нарийн хэрчсэн)
• Бяслаг
• Балзамик цуу
• Давс, перец
• Алмонд самар (бүйлс)

Өргөст хэмхээ хэрчээд, улаан лооль, редиск, бүйлсээ тавганд хийгээд дээр нь давс, перец, балзамик цуугаа гоожуулна. Энэ хооронд өндгөө яг 7 минут чанаад хүйтэн усанд сойно. Тунагаа майонез, нимбэгний шүүс, давс, перецээр амталж сайтар хольно. Саладныхаа ногоон дээр тунагаа тавиад, дээр нь хэрчсэн өндөгнүүдээ тавина. Хамгийн сүүлд нь бяслаг дээр нь үрээд л амттай, эрүүл салад бэлэн боллоо.

Англи хэлний үгийн санд:

1. Редиск- radish
2. Балзамик цуу- balsamic vinegar
3. Лаазтай туна- canned tuna
4. Бяслаг үрэх- to grate the cheese

Гриллдсэн загас, ногоо

 Амралтын өдрөөрөө гриллдсэн ногоо, загас хийж идсэн чинь рестораны хоол шиг л гоё байна гэсэн үнэлгээ авсан. Хийхэд амархан бас эрүүл гээд бодхоор байнга хийж идмээр санагдсан шүү. Зарим хүмүүс загас нь хаана байна гэж шүүмжилсэн, загасыг нь арай багадуулсан юм шиг байна лээ эсвэл таваг нь томдсон байх хэхэ.

Орц:

• Далайн цагаан загас
• Перец
• Нунтаг сармис 1 цайны халбага
• Оливын тос

Загасаа гэсгээж байгаад перец, нунтаг сармисаа хоёр талаас нь цацаад, оливын тосоор хоёр талаас сайн тосолно. Далайн загас угаасаа давстай гэж худалдагч нь хэлсэн болохоор давс хийгээгүй. Тэр хооронд шарах зуухаа 200С хэмд халаана. 

•  Улаан, шар перец 1, 1ш
• Цагаан цэцэгт байцаа 1ш
• Халгай 1 атга
• Төмс 2ш
• Лууван 1ш
• Сонгино 1ш
• Сармис 3 хумс (нухсан)
• Оливын тос
• Давс, перец
• Ганга өвс

Төмсөө дөрвөлжин хэрчээд давстай усанд 8 минут орчим чанана. Энэ хооронд бусад ногоонуудаа дөрвөлжин хэрчээд төмсөө болонгуут нь гаргаад хамтад нь листэн дээрээ холино. Ингэхдээ бүх амтлагчнуудаа хамт хийж, тостойгоо сайн хутгана. Ногоонууд бүгд амтлагч, тосоор бүрхэгдсэн байх ёстой.

Ингээд хоёр тусдаа листээ нэг зэрэг шарах зуухандаа хийнэ. Миний хувьд загасаа дээд талд нь хийсэн. Ойролцоогоор 15-20 минут шараад өнгө нь шаргалтаад болоод ирэнгүүт таваглаад л бэлэн болно доо. Зурган дээр ногооны саладтай хамт тавагласан юм.

Иймэрхүү маягаар шарсан ногоог өөр бусад стейк эсвэл шарсан тахиатай хачир болгож эсвэл ингэж шарсан загасыг будаа, төмсний нухаштай хачирлаж бэлтгэж болох юм шиг санагдсан. Амжилт хүсье!


Өөө тийм англи хэлний үгийн санд ногооны нэрнүүд:
Цагаан цэцгэн байцаа- cauliflower
Ганга өвс- thyme
Шар, улаан перец- yellow, red bell pepper

Хятад омлет

Өнөө өглөө хайртынхаа хүсэлтээр Хятад омлет хийлээ. Миний хийж чаддаг цөөхөн Хятад хоолны нэг. Хамгийн амархан Хятад хоол болохоор угаасаа энийг хийж чадахгүй хүн гэж бараг байхгүй байх. За ингээд яаж хийдгийг нь мэдэхгүй хүн байвал энэ жороор хийвэл алдахгүй шүү.

 Орц:

• 3 улаан лооль
• Ногоон сонгино (заавал хийх албагүй)
• Сой цуу
• 4 өндөг
• 3/4 цайны халбага давс
• Чимх хар перец
• Чимх элсэн чихэр
• Оливын тос (ямар ч тос байж болно)

Тосоо хайруулын тавгандаа хийж халаана. Энэ хооронд өндгөө аяганд хийгээд савхаар эсвэл сэрээгээр давс, перецээ хийгээд сайн хутгаж бэлдэнэ. Хайруулын тавгаа халангуут өндгөө хийж доод хэсгийг нь жаахан болгож байгаад хутгавал өндөг нь том том хэсгээрээ болж хуурагдана. Галаа намсгаад, өндгөө нэг буланд нь шахаж байгаад хэрчсэн улаан лоольнуудаа хайруулын тавагныхаа нөгөө буланд нь хийгээд дээр нь ногоон сонгиноо хийж хуурна. Улаан лоолио хэсэг хуураад өндөгтэйгөө нийлүүлж хутгаад дээр нь сой цуу, элсэн чихрээ хийж холиод хайруулын тавгаа таглаад галаа унтраана. 2 минут орчим ингэж байлгаад улаан лоольнууд нь бүхлээрээ хатуувтар байвал дээрээс нь халбагаараа сайн шахаж шүүсийг нь гаргаад л гүйцээ. Ийм л амархан өглөөний амттай хоол байна даа.

Англи хэлний үгийн санд:

1. Хоол хутгадаг халбага- spatula
2.  Ногоон сонгино- green onion
3. Савх- chopstick
4. Cой цуу- Soy sauce

Том Ёнг Гунг нэртэй Тайланд шөл

Энэ Тайланд шөл гоё үнэрнээсээ, харагдах байдлаасаа эхлээд ямар ч хүнд идэх хүсэл шууд төрүүлдэг хоол. Тайланд хоолонд орсон хүн болгон энэ исгэлүүн бас халуун ногоотой шөлийг иддэг байх аа. Хийх материал нь зарим нэг нь Монголд олоход хэцүү байсан ч өөр юмаар орлуулаад хийчихлээ.

Орц:

• Загас (дөрвөлжин хэрчинэ)
• Сам хорхой 6 ш
• Нимбэг 3 зүсэм
• Сармис 2 хумс (нухсан)
• Сонгино (жижиг дөрвөлжин хэрчсэн)
• Улаан чинжүүний нухаш 1 хоолны халбага (Солонгос улаан чинжүүний нухаш ашигласан)
• Коконатны крем эсвэл сүү 1 лааз
• Цоохор майлз (2 см орчим зузаантай хэрчсэн)
• Улаан лооль (жижиг дөрвөлжин хэрчсэн)
• Цагаан гаа 1 цайны халбага (нунтгийг ашигласан)
• Броколли 
• Бууцай
• Тахианы бульон (дөрвөлжин шөлний амт оруулагч ашигласан)
• Давс, перец

Коконатны крем, бууцай, сам хорхой, броколлиноос бусдыг нь усанд хийж 10 орчим минут чанана. Энэ хооронд шөлөнд амт орж, чинжүүний нухаш шөлийг улаан өнгөтэй болгосон байна. Ногоонууд нь болонгуут дээр нь коконатны крем, сам хорхой, бууцай, броколлигоо хийж 2-3 минут үргэлжлүүлэн чанана. Коконатны крем нь шөлний улаан өнгийн улбар шар болгодог. Нимбэг хийдгийн учир нь шөлний алдарт исгэлүүн амтыг гаргах зорилготой. Таваглахдаа дээр нь хэрчсэн яншуйгаар чимж болно. Будаатай хольж иднэ үү дангаар нь иднэ үү хүн хүний өөрийн дур сонирхол юм даа. Дараагийн удаа каррины жор оруулнаа.

Англи хэлний үгийн санд:

1. Улаан чинжүүний нухаш- red chilli paste
2. Броколли- broccoli
3. Цоохор майлз- celery
4. Цагаан гаа- ginger
5. Коконатны крем- coconut cream

Алимны торт

2013 оны 5-р сарын 29-нд болсон амьдралынхаа чухал тэмдэглэлт өдрөөр энэ алимны тортыг хийсэн юм. Хийхэд амархан мөртлөө амт нь яг л миний хүсдэг хэт нялуун биш жор.

Орц:

• Алим (би ногоон алим ашигласан) 4-5 ш
• Нимбэг 1 ш
• Гурил 2 стакан
• Сахар 2 стакан (нялуун болгоё гэвэл нэмж болно)
• Өндөг 8ш
• Ваниль 2 цайны халбага
• Сахарны пудр      
• Масло (хэвээ тослоход ашиглана)       

Алимнуудаа хальслаад үрийг нь голтой нь авч цэвэрлээд босоогоор нь 4 хуваана. Дараа нь хуваасан хэсгүүдээ нимгэн хэрчэнэ.  Нимбэгний шүүсийг нэг аяганд шахаад дээрээс нь алимаа хийж шүүсээр нь сайн бүрж өгнө. Энэ нь алимыг борлохоос сэргийлэх зорилготой.
Өндөгнүүдээ миксертээ хийгээд 1 минут дунд зэргийн хурдтай дээр хутгана. Тэгээд дээрээс нь сахраа, ванильтайгаа аажмаар хийж үргэлжлүүлэн 5 орчим минут холино. Хамгийн гол нь сахар нь өндгөндөө сайн уусч, зуурмаг нь хөөсөрсөн байх ёстой. Зуурмаг сайн холигдонгуут том саванд хийж байгаад модон халбагаар гурилаа зөөлхөн шигшиж хийнгээ хутгана.  Энэ хооронд зуухаа 180С дээр халаана. Зуухаа бүрэн халангуут тосолсон хэвэндээ зуурмагныхаа талыг хийгээд дээр нь алимнуудаа зүсэм зүсмээр нь өрнө. Бүх алимнуудаа өрж дуусаад дээрээс нь үлдсэн зуурмагаа нэмнэ. Эцэст нь халуун зуухандаа хийгээд 35-40 минут гадна тал нь шаргал өнгөтэй болтол хөөлгөж шарна. Энэ хооронд зуухныхаа хаалгыг онгойлгож болохгүй, учир нь гэнэтийн хүйтэн агаар хөөсөн зуурмагийг шалчийлгах аюултай. Тортоо болонгуут гаргаад бүрэн хөргөж байгаад хэвээ салгаж авна. Таваглахдаа дээр нь сахарын пудр асгаж чимэглэнэ. За амжилт хүсье.

Англи үгийн санд:

1. Алим- apple
2. Нимбэг- lemon
3. Ваниль- vanilla
4. Масло- butter
5. Сахарны пудр- powder sugar

Гиоза буюу Япон шарсан банш, ягаан манжингийн саладтай

Энэ баншийг заавал зориулалтын гурилаар нь хийхээр гоё болдог юм шиг санагддаг. Тэгээд зорьж байж солонгос дэлгүүрээс баншны бэлэн гурил авч байгаад хийлээ. Ягаан манжингийн саладыг хүний биед сайн долоо хоногт заавал нэг удаа ямар нэгэн хэлбэрээр идэх ёстой байдаг гэж сонссон болохоор бас хийчихлээ. За одоо гиоза яаж хийхийг надтай хамт сурцгаая.

Орц:

Банш

• Гахайн мах
• Тахианы цээжний мах
• Ногоон сонгино
• Цуу 1 цайны халбага
• Давс, перец
• Цагаан гаа 
• Сармис 1 хумс
• Сонгино 1ш
• Яншуй
• Баншны хөлдөөсөн бэлэн гурил

Ягаан манжингийн салад

• Ягаан манжин 2ш
• Дарсан өргөст хэмх 4ш
• Сармис 2 жижиг хумс
• Давс, перец

Баншаа хийхийн тулд эхлээд махаа бэлдэнэ. Гахайн мах, тахианы махаа адил хэмжээгээр, ногоон сонгино, 1 цайны халбага цуу, цагаан гаа, яншуй, сонгино, сармис, давс, перецээ бүгдийг нь миксерт хийж байгаад машиндана. Ингээд л мах нь бэлэн, амархан байгаа биз? Хөлдүү гурилаа шарах шүүгээнд хийж гэсгээсэн байна. Тэгээд нэг нэг ширхгээр дээрээс нь салгаж авч байгаад махаа дунд нь хийн, гурилныхаа ирмэгийг усаар норгож байгаад чимхэнэ. Гиозаг урт гонзгой чимхдэг. Хайруулын тавгаа дунд зэргийн гал дээр тавьж бага зэргийн тос хийн халаана. Тос нь халангуут баншнуудаа тавган дээр байгаа шиг шахаж өрнө. Ингээд 4 орчим минут шарж, баншныхаа доод талыг шаргал болгоно. Дараа нь хайруулын тавган дээрээ баншныхаа ёроолыг давтал нь ус нэмээд таглана. Таглаатай чигээр нь ус нь ширгэтэл дунд зэргийн гал дээрээ болгоно. Хөлдөөгөөгүй шинэхэн чимхсэн банш бол 10 орчим минут болно. Харин баншаа чимхээд хөлдөөчихсөн бол шарах шүүгээнд гэсгээх хэрэгтэй, тэгээд дараа нь шарна. Ингэхдээ 15 минут орчим болгохыг зөвлөе. Гахай, тахианы махыг хэзээ ч түүхий идэж болдоггүй. Үхрийн махыг бол шүүрхий идэж болдог. 

Хоол гал дээр болж байх хооронд хальстай нь чанаж болгосон ягаан манжингынхаа хальсыг цэвэрлэнэ. Одоо миксер лүүгээ ягаан манжин, дарсан өргөст хэмх, сармисаа хийгээд үрсэн юм шиг нарийхан хэрчинэ. Таваглахдаа давс, перецээр амтлаад боллоо. Хүмүүс майонезээр хутгах дуртай байдаг ч эрүүл салад хийе гэж бодоод тос ч хийсэнгүй.

Англи хэлний үгийн мэдлэгт тань:

1. Тахианы цээжний мах- chicken breast
2. Ногоон сонгино- green onion
3. Цуу- soy sauce
4. Цагаан гаа- ginger
5. Баншны гурил- dumpling wrapper
6. Яншуй- parsley

Монголчилсон кимбаб

Орой хөнгөн төрлийн хоол хүнс хэрэглэж биеийн жингээ барих гэж байгаа хүмүүст зориулав.

Орц:                                                                   

• Өргөст хэмх (cucumber)                                           
• Будаа
• Далайн байцаа (seaweed)
• Жижиг лууван (carrot)
• Тал сонгино
• Кимчи
• Туна (tuna)
  
• Давс, перец

Эхлээд лууван сонгиноо зөөлөн гал дээр жаахан тосонд шарж болгоно. Давс перецээр амтлаад таглаатай шарвал хурдан  хурдан болдог. Энэ хооронд сушины хулсанд дэвсгэр дээр 1 хуудас далайн байцаа дэвсээд дээр нь агшаасан будаагаа нэгэн жигд тараана. Ингэхдээ далайн байцаагаа жаахан илүү гаргах хэрэгтэй. Тэгвэл далайн байцаа эргүүлэхэд нөгөө талтайгаа сайн наалдана. Тараасан будааныхоо гол хэсэгт урт нарийн хэрчсэн өргөст хэмх, кимчи, туна, хуурсан луувангаа дэвсэнэ. Одоо далайн байцааныхаа илүү гарсан ирмэг дээр усаар норгож байгаад хулсаа зөөлөн эргүүлснийхээ дараа сайн дарж нягт болгож шахна. Сайн нягтаршуулж чанга болгож наалдуулахгүй бол зүсэхэд тал тал тийшээгээ бутраад байдаг. Ингээд бэлэн болсон кимбабаа зүсээд идэх үлдлээ.

Омлет

Өнөө өглөө ойрд хийгээгүй омлетоо хийж идье гэж бодоод хийлээ. Эрч хүч өгөх орц ихтэй өглөөний хоол хааяа нэг эрт боссон үедээ хийж идэхэд гоё байдаг шүү.

Орц:

• 3 өндөг
• Үрсэн бяслаг
• Улаан лооль жижиг дөрвөлжин хэрчсэн
• Бууцай
• Давс, перец

3 өндгөө  том аяганд хийнэ. Дээр нь давс перецээ хийж сайн хутгана. Хайруулын тавгаа дунд зэргийн гал дээр жаахан тостой тавиад хутгасан өндгөө хийж шарна. Өндөг шарагдаж байх хооронд дээр нь улаан лооль, бууцай, үрсэн бяслагаа хийгээд, өндөгнийхөө доод талыг шаргал болонгуут нэг тал руу нь эргүүлээд амттай өглөөний хоол бэлэн болно доо. Цөцгийтэй 2 зүсэм талхтай идсэн чинь бүр янзын байна лээ. Шинэ долоо хоногоо сайхан өнгөрүүлээрэй.


Англи үгийн санд:

1. Бууцай- spinach
2. Үрсэн бяслаг- grated cheese
3. Дунд зэргийн гал- medium heat

Улаан манжингийн шөл

Ойрын үед эрүүл хоол хүнсний давалгаанд орчихлоо. Хоол хийх болгондоо яаж хамгийн эрүүл маягаар хийх вэ гэж боддог болчихсон байна. Оройн хоол идэхгүй, өглөө болж өгвөл шарсан хуурсан юм идэхгүй байхаар шийдсэн. Төрөл бүрийн ногоогоор зутан шөл хийж идэхэд хүний биед муу юм байхгүй гэдэгт эргэлзэхгүй байна. Тэгээд энэ удаа улаан манжингийн шөл хийлээ.

Орц:

• Улаан манжин 1ш
• Төмс дунд зэрэг 2ш
• Сонгино 1ш
• Сармис 1 хумс
• Давс
• Перец

Ногоонуудаа жижиг дөрвөлжин хэрчээд 2 хоолны аяга орчим усанд зөөлөн гал дээр 30 минут болгоно. Тэгээд амтлагчаа хийгээд, миксерт хийж зутан шөл болгоно. Төмс хийсний учир нь гэвэл улаан манжин дангаараа байвал хэт шингэн мөртлөө хурц болох учраас төмс хийж шөлөө зутан маягийн зөөлөн амттай болгосон.  Таваглахдаа халбага цөцгийн тос нэмээд л гүйцээ.

Улаан манжин- Beetroot
Сармис- Garlic
Төмс- Potato

Сүүтэй овьёос

Өглөө болгон өндөр шарж идэх муу болохоор хааяа нэг өөр төрлийн юм хийж идэж байх нь зөв юм байна гэж шийдлээ. Долоо хоногт ядаж нэг удаа сүүтэй овьёос буцалгаж идэхэд лав буруудахгүй байх. Овьёос хоол боловсруулах үйл ажиллагааг сайжруулдаг, тэжээл ихтэй хүнс.

ОРЦ:

• Сүү
• Овьёос
• 2 зүсэм талх
• Варень

Ёроол нь түлэгддэггүй саванд - аяга орчим сүү хийгээд дээр нь нэг аяга орчим овьёос хийж буцалгана. Овьёос болохоороо зөөлөрдөг учраас  8 орчим минут буцалгаад амсаж үзэхэд болсон байвал таваглана. Дан сүүтэй овьёос идээд цадахгүй гэж бодоод вареньтай 2 зүсэм талх бэлдчихлээ.

Англи үгний санд:

1. Овьёос- Oat
2. Варень- Jam
3. Сүү- Milk

Багсарч хуурсан өндөг

Өндгийг маш олон төрлөөр бэлтгэж өглөөний цайндаа хэрэглэж болдог. Өнөө өглөө багсарч хуурсан өндөг хийж идмээр санагдаад хийлээ. Бас ногоо түлхүү хэрэглэж байхыг хичээж хажууд нь жижиг улаан лоольнууд таллаж хэрчээд, шарсан талхтай тавагласан чинь дажгүй л харагдаж байна.

ОРЦ:

• 4 өндөг
• 1 хоолны халбага масло
• Чимх давс, перец
• Улаан лооль
• Балсамик цуу
• Шарсан талх 2 зүсэм
• Оливын тос  

4 өндгөө томхон аяга эсвэл саванд хийж байгаад чимх давс, перецээ хийж сайтар хутгана. Хайруулын таваг эсвэл түлэгддэггүй шанаганд жаахан оливын тос хийж дунд зэргийн гал дээр хутгасан өндгөө хийгээд дээр нь масло нэмнэ. Дараа нь масло хайлтал нь модон халбагаар сайтар хутгаж өндгөө сэвсгэр өтгөн болгоно. Хамгийн гол нь түлж болохгүй, гал заавал дунд зэрэг байх ёстой. Энэ хооронд талхаа шарагчинд шараад, таваглахдаа таллаж хэрчсэн улаан лоольнууд дээр багахан балсамик цуу дусаагаад амттай, эрүүл өглөөний хоол бэлэн боллоо! Өдрийг сайхан өнгөрүүлээрэй. 

 

Өнөөдрийн англи үгнүүд:

 

1. Шарсан талх- Toast
2. Жижиг улаан лоольнууд- Cherry tomatoes
3. Балсамик цуу- Balsamic vinegar
4. Багсарч хуурсан өндөг- scrambled egg
5. Масло- butter

 

 

Өглөөний гриллдсэн талхтай сендвич

Миний хувьд заавал өглөөний цайгаа сайн ууж байж гэрээсээ гардаг зуршилтай. Өглөө болгон шарсан өндөг идэх муу гэж бодогдоод сүүлийн үед аль болох эрүүл өглөөний хоол идэж байхаар шийдсэн юм. Өнөө өглөө гриллдсан талхтай сендвич, чанасан өндөгтэй бэлдсэн маань дажгүй болсон шүү.

Орц:

• 2 зүсэм талх
• 2 зүсэм бяслаг
• Нимгэн хэрчсэн улаан лооль
• Песто
• Усанд хальсыг нь авч чанасан өндөг

Талхан дээрээ песто соусаа түрхээд, дээр нь бяслаг, улаан лоольнуудаа өрнө. Тэгээд нөгөө зүсэм талхаа дээр нь тавьж байгаад тосгүй хайруулын тавган дээр тавьж хуурай шарна. Талхныхаа нэг талыг шарагдангуут нөгөө талаар нь шарна. Ингэхдээ сендвичэн дээрээ таваг тавиад дээр нь хүнд юм тавьбал бяслаг хайлж, талхнууд нь хоорондоо сайн наалдах ёстой. Таваглахдаа хажууд нь усанд хальсаг авч чанасан өндгөө тавиад л бэлэн болно доо.

Англи үгсийн санд:

1. Талх- bread
2. Бяслаг- cheese
3. Песто- pesto (яншуй, самар, оливын тосыг блендердэж хийсэн нэг төрлийн соус)
4. Усанд хальсгүйгээр чанасан өндөг- poached egg

Хулууны зутан шөл

Хамгийн эрүүл хоолнуудын нэг гэвэл энэ хулууны зутан шөл яах аргагүй мөн. Хийхэд ч амархан энэ хоол солонгос хүүхнүүдийн арьсны нууц гэсэн шүү. Үргэлж мах идэхгүйгээр хааяа нэг дан ногооны зутан шөл хийж идэх сонирхолтой гоё байдаг.

ОРЦ:

• 1 жижгэвтэр хулуу
• 1 жижиг сонгино
• 1 хумс сармис
• Давс 
• Перец
• Ус

Хулуугаа таллаж байгаад хальсыг нь цэвэрлэнэ. Тэгээд голынх нь яснуудыг авч хаяна. Дараа нь том том дөрвөлжин хэрчээд бусад орцтойгоо нийлүүлэн чанана. Хулуу нь болонгуут шөлөө блендерт хийгээд зутан болгоно. Хүмүүс дээр нь крем, цөцгий нэмж идэх дуртай байдаг, гэхдээ надад дан ногоо чигээр нь эрүүл хүнс маягаар хэрэглэх нь дээр санагддаг.

Англи үгийн санд:

1. Хулуу- pumpkin
2. Ус- water
3. Эрүүл- healthy
4. Блендер- blender
5. Сармис- garlic

Плов

Миний хамгийн дуртай хоолнуудын нэг бол плов. Гэхдээ энэ хоолыг хийхэд цаг их шаарддаг учраас амралтын өдрүүдэд хийхэд тохиромжтой байдаг. Өнөөдөр өглөө эрт сэрсэн учраас плов хийж идэхээр боллоо. Энэ хоолыг зөөлөн гал дээр удаан болгодог учраас зузаан ёроолтой сав таглаатай сав хэрэгтэй.

ОРЦ:

• Үхрийн мах 4см орчим том дөрвөлжин хэрчсэн
• Үхрийн махны шөл (үхрийн ястай мах чанасан шөл)
• 1 бүтэн 1 тал сонгино (жижиг дөрвөлжин хэрчсэн)
• Сармис 5 хумс
• Лууван (нарийхан үрсэн эсвэл жижиг дөрвөлжин хэрчсэн)
• Будаа (угааж бэлдэнэ)
• Тос (оливын байвал бүр сайн)

Амтлагч:

• 1 цайны халбага давс
• Чимх паприка
• Чимх хар перец
• 4 лаврын навч

Эхлээд тосоо халааж байгаад сонгиноо хийж 3-4 минут хуурна. Дээр нь мах, амтлагчнуудаа хийгээд үргэлжлүүлж 5 орчим минут хуурна. Дараа нь луувангаа хийж хутгаад, үхрийн шөлөө махнаасаа 1 хуруу давж байхаар хийж саваа таглаж, 1 цаг орчим зөөлөн гал дээр болгоно. Цаг зөөлөн гал дээр болгоод угаасан будаагаа хийж, энд тэнд нь сармиснуудаа бүтнээр нь хийж өгнө.    Ингэхдээ болж өгвөл модон хутгуурныхаа бариулаар хэд хэдэн нүх гаргаж өгвөл будаа жигд агшина. Зөөлөн гал дээр 10-15 минут болгоход будаа агшсан байна. За ингээд гэр бүлээрээ амтархан идэх хоол бэлэн боллоо. Амралтынхаа өдрийг сайхан өнгөрүүлээрэй.

Англи хэлний үгийн санд:

1. Үхрийн мах- beef
2. Будаа- rice
3. Лууван- carrot
4. Плов- pilaf
5. Тос- oil

Гэрийн тараг

Заримдаа дэлгүүрээс авсан тарагнууд хэт их чихэртэй эсвэл хэтэрхий шингэн эсвэл исгэлэн гээд сэтгэлд хүрдэггүй юм. Тийм учраас өөрөө гэртээ тараг хийж үзэхээр шийдлээ. Дажгүй болдог юм байна. Харамсалтай нь дэлгүүрт зардаг сүүнүүд хуурай сүүгээр хийдэг болохоор миний хүссэн шиг өтгөн болж чадсангүй. Ямар ч байсан хэд хоног янз бүрийн жимстэй хольж байгаад уудаг хэргээ. Орой хоол идэхгүй гэвэл иймэрхүү маягаар тараг уугаад байвал хоолны дуршил дорхноо дарагддаг. Тэгээд ч хэт орой хоол идэх муу гэдэг шүү дээ.

 Орц:

•  1 литр сүү
• 1 цайны халбага элсэн чихэр (бактерийг тэжээх зорилготой)
• Чимх давс
• 3/4 аяга тараг

Сүүгээ халаана (гэхдээ буцалгах дөхөөд ирэнгүүт авна). Тэгээд хуруугаа дүрж үзэхэд боломжийн халуун ойролцоогоор 40С болтол нь сүүгээ хөргөнө. Тэгээд чимх давс, элсэн чихэр, таргаа хийгээд хутгана. Таглаатай саванд таргаа хийж таглаад дулаан газар байлгана. Миний хувьд духовкандаа хийгээд бараг 8 цаг болсон. Өглөө нь хийж тавиад л орой гэхэд гэрийн гоё амттай тараг бэлэн болсон байна даа.

Өнөөдрийн англи үгнүүд:

1. Тараг- yoghurt
2. Сүү- milk
3. Аяга- cup
4. Чимх- pinch

Орос маягийн банш

Өдрийн мэнд,

Би хоол хийх үнэхээр дуртай. Тийм болохоор энэ хоолны тухай блогоо хоол хийх дуртай хэн бүхэнд зориулж байна. Дээрээс нь мэдлэгээ хуваалцах зорилгоор миний блогноос хүмүүс хоолны санаа авангаа англи хэлээ сайжруулаасай гэж бодоод жор болгон дээрээ хэдэн англи үгнүүд оруулж байхаар боллоо. Гэхдээ дандаа хоол хүнстэй холбогдолтой үгнүүд байна. Яваандаа уншигчид маань өөрөө англи хэл дээр жороо хайгаад хийчихдэг болоосой гэж хүссэн юмаа. За ингээд анхны жор маань орос маягийн банш.


Аав маань нэг удаа гахайн махаар хийсэн жинхэнэ орос банш хийж өгсөн нь ердөө санаанаас гардаггүй юм. Саяхан нөгөө баншаа санаад жорыг нь интернэтээр хайсаар байгаад олоод хийсэн чинь дажгүй болдог юм байна. Бас баншаа өөрсдөө хүссэнээрээ амталж болно.

ЖОР

Мах:

• 300г машиндсан гахайн мах (залхуурахгүй бол гараараа татсан ч болно)
• 1 ш машиндсан сонгино (эсвэл жижигхэн дөрвөлжин хэрчсэн)
• 1 хумс сармис (нухсан эсвэл жижигхэн хэрчсэн)
• Давс ба перец

Гурил:

• 500г гурил
• 1 өндөг
• Тал цайны халбага давс
• 1 аяга бүлээн ус 

Хачир:

• Цөцгийн тос эсвэл оливын тос

Махныхаа орцыг бүгдийг нь хольж хутгаад бэлдэнэ.

Гурилныхаа голд нүх гаргаад өндөгөө хийж хутгаад, дээр нь давсаа хийж уусгасан бүлээн усаа нэмээд зуурна. Гурилаа 30 орчим минут амраана.

Гурилаа амраасныхаа дараа баншаа хийнэ. Ингэхдээ гурилаа нэг нэгээр нь жижигхэн хувааж хэрчээд нэг бүрчлэн элдэж чимхэх эсвэл нэгмөсөн томоор нь элдэж байгаад стаканаар дээр нь дарж авсан гуриландаа махаа хийж чимхэж болно. Аль амархныг нь өөрөө сонгоорой. Баншаа буцалж байгаа усанд хийж чанана. Банш дээшээгээ хөвөөд ирвэл болсон байна гэсэн үг. Хөлдөөсөн бол харин болохдоо арай удаан байна. Таваглахдаа хажууд нь цөцгийн тосоо тавих эсвэл дээр нь оливын тос асгаж өгнө.

Орос маягийн банш

Шинэ үгс:

1. Банш- dumpling
2. Гахайн мах- pork
3. Сонгино- оnion
4. Сармис- garlic
5. Давс- salt
6. Хар перец-  black pepper